විදුලි පංකා සමග සෙල්ලම් නොකළ යුත්තේ ඇයි?

ජගත්ගේ පැය විසිහතර පුරාම දුවන විදුලි පංකාව දූවිලි වලින් වැහිලා කළු පාට වෙලයි තිබුණේ. ගිය සතියේ ආරක්ෂක මේසෙ උඩින් බිමට වැටුණු පාර ඒකෙ ආරක්ෂක දැල සවිවෙන ප්ලාස්ටික් කෑල්ල කැඩුණට පස්සෙ ජගත් ඒක හදාගන්න ට්‍රයි කරත් වැඩේ හරි නොගිය නිසා නිරාවරණය වෙච්ච පෙති සාමාන්‍ය වේගයකින් ජගත්ට සුළං සැපයුවා.

එදත් වෙනදා වගේම උණුසුම් දවසක් වුණු නිසා ජගත් ටීෂර්ට් එකක්වත් නැතුව විදුලි පංකාව ඉස්සරහට වෙලයි හිටියේ. ගෙදර කවුරුවත් නැති හින්දා කොට කලිසමකුත් ගහගෙන, තේකකුත් හදාගෙන බිබී හිටිය ජගත්ට දැනුණේ පුදුමාකාර කම්මැලිකමක්.

ෆිල්ම් එකක් බලන්න හසිත ගෙදරට එන්නත් ටික වෙලාවක් තිබුණු නිසා ජගත්ට කරන්න කිසිම දෙයක් තිබුණෙ නෑ. නිකං ඉන්න එකේ කලිසමේ තිබුණු පටියක් ඇඟිල්ල වටේ ඔතපු ජගත් තේ කෝප්පේ අඩියටම ඉවර කරලා පුටුවෙන් නැගිට්ටා.

“මොන මගුලක්ද”

නැගිට්ට ගමන් ඔළුව රත් වුණු පාරට ජගත්ට කියවුණා.

කාමරය වටේ දෙතුන් පාරක් ඇවිද්ද ජගත් නැවතුණේ විදුලි පංකාව ළඟ.

සතියකට විතර කලින් මේ නිරාවරණය වුණු විදුලි පංකාවේ පෙති වලට කැපිච්ච අතේ සලකුණු තවමත් මැකිලා තිබුණේ නෑ.

“මගුල”

ඒක වුණේ අත්වැරදීමකින්. පෙති වල පිටිපස්සේ තියෙන දාරය තියුණුයි. වැඩි වේගයකින් කැරකෙන වෙලාවක අතක් පයක් වැදුණොතින් තුවාලයක් වෙන එක සීයට සීයක් සහතිකයි.

ඒ පැත්තට අත නොගහන්න ජගත් තීරණය කළේ එදාමයි.

ජගත් කැරකෙන විදුලි පංකාවේ පෙති වලට ඉදිරිපසින් අත තිබ්බා. කැරකෙන්න නොදී නවත්තන්න කරපු නියෝගයට අකමැත්තෙන් පංකාව වේගය අඩු කළා. ඉවතට ගත්තු ජගත්ගේ ඇඟිලි දූවිලි වලින් කළු පාට වෙලා.

ජගත් වතුරෙන් තෙමපු රෙදි කෑල්ලක් අරගෙන ආවේ නිකං ඉන්න එකේ පංකාව සුද්ද කරලා දාන්න හිතාගෙන. විදුලි පංකාව නොනිවාම වැඩේ කරන්න ජගත්ට හිතුණේ තිබුණු රස්නය හින්දද නැත්නම් වෙනත් හේතුවක් හින්දද කියල අපි හරියටම දන්නෙ නෑ.

පෙති වල තිබුණු දූවිලි වතුරෙන් පෙඟුණු රෙදි කෑල්ල ලේසියෙන්ම උරාගත්තා. වැඩි වෙලාවක් යන්නෙ නැතුවම දූවිලි වලින් නිදහස් වුණු විදුලි පංකාව දිලිසෙන්න පටන්ගත්තා. ජගත්ට තමන් ගැන ආඩම්බරයක් ඇතිවුණා.

ආඩම්බරය වැඩි වෙලාවක් යන්න කලින් කුතුහලයට හැරවුණේ විදුලි පංකාවෙන් ආපු අමුතු සද්දයක් නිසා. ජගත්ගේ කලිසමේ පටියක් විදුලි පංකාවේ මෝටරයට අහුවෙලා තිබුණා. මෝටරයේ පෙති සවිවුණු තැනට අහුවුණු පටිය හිතන්න බැරි වේගයකින් එතී ගියා. තවත් එතෙන්න තැනක් නොතිබුණු නිසා විදුලි පංකාව මේසයෙන් ඉස්සිලා ජගත් දිහාට ආවා.

ජගත්ට මුකුත්ම කරන්න වෙලාවක් තිබුණේ නෑ. විදුලි පංකාවේ වේගෙන් කැරකෙන ප්ලාස්ටික් පෙතිවලට අහුවුණු ජගත්ගේ පපුවේ හම ලේසියෙන්ම කැපිලා ගියා. තවත් තත්පර කීපයකට පස්සේ විදුලි පංකාව නැවතුණේ එක් පෙත්තක් ජගත්ගේ බඩ ඇතුළේ නතර වුණාට පසුවයි.

“මගුල”

ජගත්ට කියවුණා. ටික වෙලාවකින් ඔහුගේ සිහිය යන්න ගියා.

හසිත එනකොට ජගත් ලේ විලක් මැද.

TEENAGER DIES IN TRAGIC FREAK ACCIDENT INVOLVING A TABLE FAN

11 thoughts on “විදුලි පංකා සමග සෙල්ලම් නොකළ යුත්තේ ඇයි?

  1. මරු..,
    උඹට තියෙන්නේ ලේ වැකුණු මනසක්.., අර පූල් එකේදීත් වැටුනේ ලේ පෙරාගෙන..,
    Just like tarantino..! 🙂

Leave a Reply

Your email address will not be published. Required fields are marked *