මලින්තගේ සටහන | Malinthe’s Note

මොකක්හරි හේතුවක් හින්දා මට කවදාවත් ebay එකෙන් කිසිම දෙයක් ගන්න හිතිල නෑ හේතුව මොකක්ද කියල නම් තාම ෂුවර් නෑ. ඒ වුණාට අලුත් ෆෝන් එක ගත්තට පස්සෙ නම් ඒක පැත්තෙ ගිහින් මොනවහරි නොගෙන බෑ කියල හිතුණ.

ඉතින් මොකද කරේ, ebay එකට ගිහින් එකවුන්ට් එකකුත් අටවගෙන වැඩේට බැස්ස. ඉස්සෙල්ලම ඕන වුණේ මොකක්හරි හොඳ ඉයර්ෆෝන් එකක් ගන්න. මං ගාව කලින් තිබුණෙ නුවරින් ගත්තු Phillips එකක්. ගාන නම් හොඳටම වැඩියි. ඒත් වෙන ගන්න දෙයක් මෙහෙ තිබුණෙ නෑ. ebay එකෙන් ගන්න අදහසක් තිබුණෙත් නෑ ඒ දවස්වල. කොහොමහරි ඉතින් ඔය ගත්තු එක ගොඩක් කල් පාවිච්චි කරා. කැඩුණා. ආයෙත් ගන්න වුණේ ඒ වර්ගෙම තමයි.

ඉතින් මොකද කරේ, හොයන්න පටන් ගත්ත අලුත් ඉයර්ෆෝන් එකක්. In-ear තමයි ගන්න ඕන. නැත්තං බස් එකක එහෙම යද්දි මෙලෝ දෙයක් ඇහෙන්නෙත් නෑ, ඇහෙන්න සද්දෙ වැඩි කරාම කන් දෙකත් ඉවර වෙන එකනෙ වෙන්නෙ. ඉතින් ‍ඔහොම හොයන අතරේ හම්බවුණා Skullcandy කියල බ්‍රෑන්ඩ් එකක්. Review නම් හොඳයි. ඉතින් මුලින් තෝරගත්තු Smokin වර්ගෙ එකක් ගන්න ලෑස්ති වෙලා, ඊට වඩා Ink’d කියන එක හොඳයි කියල තිබුණ නිසා ඒකක් ගන්න හිතාගත්ත.

ඉතින් ebay එකට ගිහින් ඕක ටයිප් කරාම හෙන ලැයිස්තුවක් ආවා.  සාමාන්‍යයෙන් අඩුවට තිබුණත් ගෙන්නගන්න යන වියදම දැක්කම වැඩේ අත්හරින්න තමයි හිතුණෙ. ඊටපස්සෙ තමයි Sort by කියන කෑල්ල දැක්කෙ. ඉතින් Price + Shipping: Lowest First දුන්නා හිතේ තිබුණු චකිතය හින්ද වැඩි ආරස්සවට කියල හිතල Top-rated Sellers විතරක් පෙන්නන්න කියලත් දැම්ම.

ඉතින් හොඳ එකක් තෝරගත්තා. මිළදී ගත්තා. ඉතින් ඒ වෙලාවෙ ඇතිවුණු ජොලිය හින්ද ෆෝන් එකට කේස් එකකුත්, ස්ක්‍රීන් ප්‍රොටෙක්ර් එකකුත් ගත්තා.

Skullcandy Ink'd

දැන් ඉතින් ඕක එනකල් බලාගෙන ඉන්නත් එපැයි. කොහොමහරි ඇමරිකාවෙ ඉඳන් ඉයර්ෆෝන් එක එන්න සති කීපයක් යයි කියල හිතාගෙන හිටිය. ඒත් හරියටම සතියකින් කේස් එකයි, ඉයර්ෆෝන් එකයි එවල කියල වැටිල තිබුණ.

කොහොමහරි ඉතින් සතියකට පස්සෙ බඩු ඇවිල්ල තිබුණ.

ඉතින් ඉස්සෙල්ලම බැලුවෙ කේස් එක. ඒක හොංකොං වලින් හින්ද Free Shipping. ඒකට ගියෙ රුපියල් දෙසීයක් විතරයි හොඳ තත්ත්වයක තිබුණ. හරියට ෆිට් වෙනවා. කිසිම අවුලක් නෑ.

අල වුණු ඉයර්බඩ් එක

ඊටපස්සෙ ඉයර්ෆෝන් එක. ඒක තමා ගොඩක්ම බලාපොරොත්තුවෙන් හිටියෙ. සති‍යෙන් ආපු එක ගැනත් පුදුමයි. ඉතින් දඩිබිඩි ගාලා (එක්කෙනෙක් නම් මේ දඩිබිඩි කියන එකට හිනාවෙනව ) ගලවල අරගෙන ෆෝන් එකට හයි කරල සින්දුවක් දැම්මා. හැක්? මේ මොකද? පැත්තකින් සද්දෙ ඇහෙනවා. අනිත් පැත්ත එහෙම්පිටින්ම අවුල්. මං ඒක අරගෙන ඉයර්බඩ් එක ගලවල බැලුවම තමයි දැක්කෙ වෙලා තියෙන දේ. ඒක තැලිල ඇතුලට ගිහින්.

එවෙලෙ ඇතිවෙච්ච හැඟීම් නම් ඉතින් කියලා වැඩක් නෑ. මාර අප්සට් එක. වීරයා වගේ ඕඩර් කරල  දැන් අලයක්නෙ හම්බවෙලා තියෙන්නෙ. මං හිමින් සීරුවෙ මල්ලිට කිව්ව ඒක අප්සට් වෙලා කියලා

දැන් ඉතින් මොනව කරන්නද, අප්සට් එකේම ebay එක පැත්තට ගිහින් එවපු එක අවුල් කියල seller ට මැසේජ් එකක් යැව්වා. ඒකෙ return බාරගන්නෙ නෑ කියල තිබුණ නිසා කිසිම බලාපොරොත්තුවක් තිබුණෙ නෑ.

කොහොමහරි ඉතින් රෑ වෙලා ඊමේල් බලද්දි පිළිතුරක් ඇවිල්ල තිබුණා.

එවපු එකට හානි වෙලා තිබීම ගැන සමාව ඉල්ලලා, මට ඒව ආපහු යවන එක වියදම් වැඩි නිසා කැඩුණු එක තියාගන්න කියල අලුත් එකක් එවෙලෙම එවනව කියල තමයි පණිවිඩේ තිබුණෙ. ඇත්තටම එවෙලෙ නම් පුදුම හිතුණා.

ඉතින් අද තමයි අලුත් එක ආවේ. මේකෙ නම් කිසිම ප්‍රශ්නයක් නෑ. නියමෙට වැඩ.

ඕක තමයි ඉතින් මගේ පළමු ebay අත්දැකීම. කොහොම වුණත් ස්ක්‍රීන් ප්‍රොටෙක්රේ නම් තාම ආවෙ නෑ.

කාලයක් බලාගෙන ඉඳල  ඉඳල අයිෆෝන් එකක් ගත්තට පස්සෙ සිංහල දාගන්න එක තමයි ලොකු අවශ්‍යතාවය වුණේ. ට්විටර් එකේ එහෙම දකින්න ඇති මේකට සිංහල දාන්න දීපු සටන.  කාලිංගයි දසුනුයි මමයි මේක හරියට හදාගන්න සෑහෙන්න සටනක් දුන්නා. ඒත් වැඩේ හරිගියේ නෑ. අකුරු ටික හරියට ආවට Rendering අවුල් දිගටම ආවා.

ඉතින් සති කීපයක්ම මේ වැ‍ඩේ කරගන්න දඟලලා දඟලලා ඉවර වෙලා අන්තිමේදි වැඩේ අත්හරින තත්ත්වයටම ආවා. අන්තිමේදි මොකද කරේ, ඇපල් වලට සිංහල ෆොන්ට් එකක් හදපු නිකලස්ට කතාකරා. මං නික්ගෙ ෆොන්ට් එකෙන් Arial එකට කොපි කරල හදපු ෆොන්ට් එක එයාටම දුන්නා. නික් ඒකට අවශ්‍ය script එක දාල දුන්නා. මේ ෆොන්ට් එක ෆෝන් එකට දාල බැලුවම වැඩේ ගොඩ! පුදුම සතුටක් තමයි එවෙලෙ ඇතිවුණේ. මං ඒක දැකපු ගමන් කෑගහපු හැටි ඇහුණනම් කට්ටිය බිම පෙරලි පෙරලි හිනාවේවි

කොහොමහරි නික් කියපු විදියට මේ ෆොන්ට් එක ප්‍රසිද්ධියේ බෙදාහරින්න නම් බැරිලු. Copyright ප්‍රශ්නයක් වෙන්න ඇති. අවශ්‍ය නම් මට කෙලින්ම කියන්න

මේ තියෙන්නෙ අයි‍ෆෝන් එකේ දැන් සිංහල පේන විදිය තමයි. සමහර තැන් වල තාම පොඩි පොඩි අවුල් එනවා. ඒවා ඉදිරියේදි හදාගන්න පුළුවන් වේවි.

යතුරුපුවරුවක් හදාගන්නත් ඕන සිංහල ටයිප් කරන්න. කරන විදිය ගැන තාම අදහසක් නෑ. කන්වර්ටර් එකකින් නම් කරගන්න පුළුවන්. ටිකක් එහෙම කරල බැලුවා. සාර්ථකයි.

ඉතින් මේ තොරතුරු අස්සෙ අද සූර්යග්‍රහණයකුත් වුණානෙ. දවල් ට්විටර් එකේ සද්දෙ ඇහෙනකොට තමයි ගිහින් බැලුවෙ. ඊටපස්සෙ මල්ලිත් එක්ක කැමරාවක් අටවලා ෆොටෝ ටිකක් ගත්තා. වටපිටාව බොහෝ දුරට අඳුරු වුණා. උෂ්ණත්වයත් අඩුවුණා. නියම අත්දැකීමක්.

කැමරාව අටවගත්තෙ පරණ කැසට් එකක් කඩලා ගත්ත ටේප් වලින්

මගේ ෆොටෝ බ්ලොග් එක ආයෙමත් පටන්ගත්ත. ගිහිල්ල බලන්න: malinthe.info

ඉතින් ඉතින් මෙන්න කවදාවත්ම නොවෙයි කියල හිතපු දේ සිද්ධවුණු හැටි! කට්ටිය දන්නවත් ඇති දැන් කාලෙක ඉඳන් මොබිටෙල් පාවිච්චි කරන්න බැරි තත්ත්වයට පත් වෙලා තියෙන හැටි ගැන. දැන් දවස් කිපයක ඉඳන් මේක පාවිච්චි කරන්නම බැරි තත්ත්වයකට ඇදගෙන වැටුණා. මොබිටෙල් එකෙන් කතාකරලා කිව්වෙ අප්ග්‍රේඩ් එකක් කළා, දැන් හරි ඇති කියලා. ඒත් වෙනසක් නෑ කිව්වම තව හොයල බලන්නම් කියල තමයි කිව්වෙ. ඒත් ඕක කවදා හැදෙයිද කියලා බලාගෙන ඉන්න බැරි හින්දා සහ දැන් සම්බන්ධතාවය වැටිල තියෙන තත්ත්වය දැක්කම හොඳ වචන මතක් වෙන හින්දා මේකට මොකක්හරි කරන්න කියලා හිතුණෙ.

අල මොබිටෙල්

දැන් කාලෙක ඉඳන් ඩයලොග් වල 3G සංඥා ටිකක් මෙහෙට ලැබෙන හින්දා ඒකට මාරුවෙන එක හොඳයි කියලා හිතුණා. පහුගිය දවස් වල ‍ඩයලොග් ප්‍රීපේඩ් බ්‍රෝඩ්බෑන්ඩ් වලින් ටිකක් පරික්ෂා කරලත් බැලුවා. වේගය හොඳයි. අවුල් නෑ. ඉතින් එහෙම එකක් තියෙද්දි මොබිටෙල් පාවිච්චි කරන එක තේරුමක් නෑනෙ.

ඉතින් අද ගියා ඩයලොග් එක පැත්තට කාලෙකට පස්සෙ. මල්ලිවත් ඇදගෙන ගියා, මිනිහටත් ඕව ටිකක් පුරුදු කරන්න ඕනනෙ. ඉතින් ඩයලොග් එකට ගිහින් ඒකක් ගන්න පුළුවන්ද කියලා විස්තර අහලා, කොල කෑල්ලක ලියපු නම්බරයකුත් අරගෙන වාඩිවෙලා හිටියා. වැඩි වෙලා ඉන්න වුණේ නෑ ඉතින්. අන්තිමට ගිහින් අවශ්‍යතාවය කියලා මොඩම් එක නැතුව සම්බන්ධතාවය ගත්තා. එතන එක රිසිට් එකක අවුලක් වෙලා ආයෙ සැරයක් ඒකෙ කොපියක් ඉල්ලගෙන එන්නත් වුණා. ඒ ඇරුණම වෙන මුකුත් අවුලක් වුණේ නෑ.

Eacan E-510

ඉතින් ඒ අස්සෙ අලුත් ස්පීකර් සෙට් එකක් ගන්නත් රවුමක් ගැහුවා. 5.1 එකක් ගන්න හිතාගෙන හිටියෙ ඒත් ඒක තේරුමක් නෑ කියල හිතුණු නිසා අන්තිමට ෂොප් එකක කට්ටියකට වද දීල දීල ගත්ත අහලවත් නැති බ්‍රෑන්ඩ් එකකින් 2.1 එකක්. Eacan කියල චයිනීස් එකක් සද්දෙ නම් හොඳයි. ගෙදර ආපු වෙලේ ඉඳන් ‍ඕක චෙක් කරන එක තමයි කරේ.

ටවුන් එකේදිම ‍ඩයලොග් එක දාලා බැලුවා. වේගය නියමයි. කාලෙකට පස්සෙ Top Gear බැලුව අද කිසිම කරදරයක් නැතුව. අනිත් එක මොබිටෙල් එකේ වගේ නෙමෙයි, අපට වෙනමම IP ලිපිනයක් ලැබෙනව.

ම් ඉතින් ඔය විදියට තමයි අද විස්තරේ. දැනට නම් ඩයලොග් අවුලක් නැතිව වැඩ. ඉදිරියේදී අවුල් වුණොත් ඉතින් ඒ ගැනත් කියන්නම්

මේ ඩයලොග් එකේ ස්පීඩ්ටෙස්ට් කීපයක්:

ගෙදරදි

නුවර ටවුමෙදි

මේ දවස් දෙක තුනකට හිටු කියලා ලියනව මං අදත් ලියන්න යන්නෙ ඊයෙ වුණු සිදුවීම් ගැන (දෙසැම්බර් 19, 2009) ඉතින් ඊයේ තමයි සිංහල බ්ලොග්කරුවන්ගෙ සංසදයෙන් සංවිධානය කරපු පළමු සිංහල බ්ලොග්කරුවන්ගේ හමුවීම තිබුණෙ. මේක පැවැත්වුණෙ එක්සෙල් ලෝකයෙ.

ඉතින් කලින් දවසෙ මොබිටෙල් එකෙන් ගත්තු ටිකට් එකත් අරගෙන උදේම ගියා ස්ටේසමට. Deeps ටත් ටිකට් ගන්න කලින් දවසෙ පැය ගානක් ට්‍රයි කරා. ඒත් සම්පත්නෙට් එකේ තියෙන ලොකු අල කීපයක් නිසා අන්තිමට ඒ වැඩේ හරිගියේ නෑ. උදේ ඇවිල්ල ටිකට් ගන්න හිටියත් ඒ වැඩෙත් හරිගියෙ නෑ. ඉතින් අන්තිමට deeps බස් එකේ ආවෙ. මං ඉතිං දුම්රියෙ ගියා. ‍ඉතින් ඔහොම යන අතරතුර හුරුපුරුදු මූණක් දැක්ක. බැලින්නම් ඒ ප්‍රභාෂ්. ඉතින් පොරත් එක්ක කතාකර කර ආව කොළඹට. අතරමගදි දුම්රියේ තියෙන භෝජන රථයෙන් කිරි තේ සහ ප්ලේන්ටි බිව්වා

එළ තේ!

ඉතින් අපි කොටුවට ආවට පස්සෙ ප්‍රභාෂ් හවස තියෙන දුම්රියට ටිකට් ගන්න බැලුවා. ඒත් අපට කවුන්ටරේ හොයාගන්න බැරුව ඒ වැඩේ අතඅරින්න වුණා.

Deeps ගෙ බස් එක පරක්කු හින්ද මමයි ප්‍රභාෂුයි අන්තිමට එක්සෙල් ලෝකෙට ආව. අපි එනකොට වැඩිය කට්ටිය ඇවිල්ල හිටියෙ නෑ. කොහොමහරි ටික වෙලාවකින් බුද්ධික අයියයි සූ අක්කයි ආව. ඉතින් අපි කට්ටියම ගිහින් උපකරණ උස්සගෙන එනකොට කාලිංග, තිලිණ, ඉන්දරේ ඇතුළු කට්ටියත් ආව.

ඉතින් අපි උපකරණ ටික අටවන්න පටන්ගත්තා. මේ වෙනකොට අපේ මිත්‍රයො ටික ටික එන්න පටන් අරගෙනයි තිබුණෙ. Deeps ටික වෙලාවකට පස්සෙ ආවෙ.

පුටු කැමරාව සහ විකාශන මෙහෙයුම් පුටුව

ඉතින් හමුවීම ලයිව් ස්ට්‍රීම් කරන්න ustream එකේ එකවුන්ට් එකක් හැදුව. මට වැරදිලා වැරදි ලින්ක් එක ට්විට් කරල පස්සෙ තමයි දැක්කෙ ඉතින් අන්තිමට හරි එක දාල, වෙබ්කැම් එකක් පුටුවක් මත අටවල තමයි සජීවි විකාශය දුන්නෙ. පුටු කැමරාව එහාට මෙහාට කිරීම ප්‍රභාෂ් බාරගත්ත. කොහොමහරි ස්ට්‍රීම් කරන ගමන් රැකෝඩ් කරගත්ත. කොලිටිය නම් ටිකක් අඩුයි ඒ වුණාට එතරම්ම අවුලක් නෑ. තව මයික් දෙක තුනක් තිබ්බනම් හැමෝම කතාකරන ඒව හරියට පටිගත කරගන්න තිබුණ. ලබන සැරේ ඒ අවුල් හදාගන්න බැරියැ. මෙන්න මෙතනට ගියානං අපි රැකෝඩ් කරපු වීඩියෝ කීපයක් බලන්න පුළුවනි.

මෙහෙයුම් මේසය

ඉතින් කොහොමහරි හමුවීමේ වැඩකටයුතු ටික නියමෙට සිද්ධ වුණා. කාලිංග සංසදේ අරමුණු ආදිය ගැන පැහැදිළි කළා. බ්ලොග්කරුවෝ තමන්ගෙ බ්ලොග් ආදිය ගැන හැඳින්වීම් කළා. දසුන් යුනිකේත ගැන කෙටි පැහැදිළි කිරීමක් කළා. ඔය විදියට ඉතින් වැඩසටහන ගලාගෙන ගියා. මං සුපුරුදු පරිදි පොටෝ අම්බානකුත් ගත්ත.

ඒ කටයුතු අහවර වුණාට පස්සෙ කට්ටිය කන්න ගියා. ඒකත් ලේසි වුණේ නෑ සෙනසුරාද හින්ද සෙනග වැඩියි. වාඩිවෙන්න තැන් අල්ලගත්තෙත් බොහොම අමාරුවෙන්. කොහොමහරි ඒකත් ඉවර කරලා ගෲප් පොටෝ කීපෙකුත් ගත්ත.

මේ ක්‍රමයේ දෝස

ඉතින් මට කෝච්චිය අල්ලන්නත් යන්න තිබුණු හින්ද මමයි ප්‍රභාෂුයි deeps මකරයි කට්ටියගෙන් සමුගෙන පිටත් වුණා. බස් එකේ යන අතරමග ආයෙමත් චෙක් කරන්න නවත්තපු හින්ද කෝච්චිය මිස් වෙයි කියල හිතුණ. ඒත් කොහොමහරි වෙලාවට ආව. අනිත් කට්ටිය බස් එකකින් පිටත් වුණා.

නුවරට එනකොට හවස් වෙලා. deeps ලා එතකොටත් බස් එකේ. නුවරට වැස්ස. කුඩයකුත් නොතිබුණු හින්ද වැස්සෙ තෙමි තෙමිම බස් එක තියෙනවද බලන්න ආව. සෙනග වැඩි හින්ද ඩෙවෝන් එක පැත්තට ගිහින් කෝපි එකකුත් බීල (තේ නෙවෙයි) ආයෙ ආව බස් තියෙනවද බලන්න. එතකොට තව එකක් ඇවිල්ල. ඒකෙ නැගල ගෙදර ආව.

ගත්තු පොටෝ අප්ලෝඩ් කරන්න ටික වෙලාවක් ගියා මොබිටෙල් අල හින්ද. ඒක තාමත් එහෙමම තමයි. අද උදේ නම් මොබිටෙල් එකේ ඉංජිනේරුවක් කතාකරල අල හරිද ඇහුව. ඒත් වෙනසක් නෑනෙ. දැනුත් අප්සට් හින්ද මේ ඩයලොග් ප්‍රීපේඩ් එකකින් සම්බන්ධ වෙන්නෙ. මේක නම් නියමෙට වැඩ. හිතුණොත් මොබිටෙල් එක විසිකරල ඩයලොග්ම පාවිච්චි කරනව

එහෙම තමයි ඉතින් දවස. හැබැහින් නොදැකපු යාලුවො ගොඩක් මුණගැහුනු එක ගැන ගොඩක් සතුටුයි. කතාබහ කරල දැන අඳුනගෙන… මීට කලින් අන්තර්ජංජාලෙන් කතා කරපු අය හැබැහින් හම්බවුණාම කොච්චර සතුටක්ද වැඩසටහන ගැන වැඩි දෙයක් ලිව්වෙ නෑ මොකද මේක කියවන ඔක්කොම වගේ ආපු නිසා ෆොටෝ නම් එකසිය ගානක් ගත්තා. ඔක්කොම මෙතන දාන්න බැරි එකයි අවුල. ඒ හින්ද තෝරගත්ත දෙක තුනක් විතරයි දැම්මෙ. ඒ වුණාට ඔක්කොම මෙතැනින් බලාගන්න පුළුවනි.

අපි! පොටෝ එක හසිතගෙන්

අද නම් සිද්ධ වෙච්ච දේවල් ටික නොලියා බෑ. ඒ හින්ද මෙන්න ලියන්නයි යන්නෙ.

ඉතින් දැන් ටික දවසකට කලින් මොබිටෙල් මගින් දුම්රිය ප්‍රවේශපත්‍ර වෙන් කරගන්න පද්ධතියක් හැදුවනෙ. ඒක නියම වැඩක් කියල තමයි මං හිතුවේ. කොහොමහරි ටිකට් එකක් වෙන්කරගන්න රුපියල් පනහක සේවා ගාස්තුවකුත්, ඒ ගන්න කෝල් එකට විනාඩියකට රුපියල් අටකුත් ගෙවන එක ටිකක් අප්සට් වගේ කියලා හිතුණා. ඒ වුණාට මේක ට්‍රයි නොකර බෑනෙ. ඉතින් මොකද කරේ ඒ නම්බර් එකට කෝල් එකක් අරගෙන හොයල බැලුව.

මං මුලින් හිතුවෙ මේකෙ ඇත්තෙ මොකක්හරි ස්වයංක්‍රීය පද්ධතියක් වෙන්න ඇති කියලා. බලාපොරොත්තු වුණේ ස්වයංක්‍රීය පද්ධතියකින් ටිකට් එක වෙන් කරලා mms මගින් වගේ ටිකට් එක ‍දුරකථනයට එන මොකක්හරි… එහෙම විදියක් තිබ්බ නම් නියමයි. ඒත් මේකෙ ටිකට් එකක් වෙන්කරගන්න නම් පාරිභෝගික සේවා නිළධාරියෙකුට කතාකරන්න ඕන. කොහොමහරි ගත්තු එකේ නිකන් ඉන්න බැරි හින්ද විස්තර ටිකක් ඇහුව. ඒ අස්සෙ ක්‍රෙඩිට් ඉවරවෙලා කෝල් එක කට් වුණා

ඉතින් මේ සෙනසුරාදා කොළඹ යන්න වෙන හින්ද ජොලියටත් එක්ක මේකෙන්ම ටිකට් එක වෙන්කරගන්න හිතුණා. අම්මගෙ ෆෝන් එක ඉල්ලගෙන ඒකෙන් කතාකරා. කොහොමහරි වැඩේ හරි. ටිකට් වෙන් කළා. දුරකථන අංකයයි, අයිතිකාරයගෙ නමයි අරව මේවයි, ටිකට් එක ගන්න එන එක්කෙනාගෙ හැඳුනුම්පතේ අංකයයි… ඒ ටිකත් දුන්න. කතාකරපු නිළධාරිනිය එකම දේ කිය කිය ටික වෙලාවක් හිටියා. ඒගොල්ලන්ට නම් මොකද, අපට‍නෙ ඕවට තදවෙන්නෙ. විනාඩියකට අටක්නෙ

කොහොමහරි වෙන් කරල ඉවර වුණාට පස්සෙ අංක දෙකක් ලැබුණ. ඔය අංකය ගෙනිහිල්ල මොබිටෙල් ශාඛාවකින් හරි දුම්රිය ස්ථානයෙන් හරි ටිකට් එක ගන්න ඕන.

තදබදේ

ඉතින් අද උදේම යන්න කියලා හිතාගෙන හිටියෙ ඊයෙ කොණ්ඩෙ කපාගන්නත් එක්කම. දවල් ජනාධිපතිවරණ රැලියක් තියෙන හින්දා ඒකට කලින් ගෙදර එන්න පුළුවන් කියලා හිතාගෙන. ඒ වුණාට අද නැගිටින්න පරක්කු වුණා. කොහොමහරි දවල් වෙලා තමයි ගෙදරින් පිටත් වුණේ. වැව රවුම හරියෙ ඉඳන්ම වාහන තදබදේ. කොළ පාට කොඩි ගහපු බස් කීපයකුත්, ආධාරකරුවො කට්ටියකුත් දැක්කා. බන්ධනාගාරය හරියට එනකොට තවත් කොළ පාට බස් එකක්. තදබදය වැඩියි. මාකට් එක හරියට ඇවිදගෙන එනකොට රතිඤ්ඥා, පෙළපාලි ආදිය තිබුණ. මට ඉතින් ඕවගෙන් වැඩක් නැති හින්ද නරඹන්නො අතරින් රිංගලා KCC එක පැත්තට ගියා.

මොබිටෙල් ටිකට්

කොහොමහරි මොබිටෙල් එකට ඇතුල් වෙනකොට සිකියුරිටි බුවෙක් මගෙන් ඇහුවා සර් මොකක්ද කරගන්න ඕන කියලා. මං කිව්ව ‘ට්‍රේන් ටිකට්’ එක ගන්න ඕන කියල. මේ මනුස්සයා අන්දමන්ද වෙලා වගේ මං දිහා බලාගෙන ඉන්නවා. ‘ට්‍රේන් ටිකට්? සර් මෙහෙන් ඒව ගන්න බෑනෙ’ කිව්වෙ නැතෑ. මං ඉතින් ෆෝන් එක පෙන්නලා ‘ඇයි දැන් ෆෝන් එකෙන් බුක් කරන්න පුළුවන්නෙ’ කියල කිව්ව. මේ මනුස්සය තාම අන්දමන්ද වෙලා. ඊටපස්සෙ එතන හිටපු මැනේජර් කෙනෙකුටද කොහෙද කතා කරල ඇහුව ‘සර් මෙහෙන් ට්‍රේන් ටිකට් ගන්න පුළුවන්ද?’ කියලා. ඒ මනුස්සයා මගෙ ළඟට ඇවිත් ‘පුළුවන් සර් අන්න අතනට යන්න’ කියල කිව්වා. මං ඉතින් කවුන්ටර් එකට යන අතර මැනේජර් (හරි කවුරුහරි) සිකියුරිටි බුවාට කියනව ඇහුණා ‘දැන් මෙහෙන් ට්‍රේන් ටිකට් ගන්න පුළුවන්නෙ’ කතාවක්. හිත යටින් හිනාවෙවී කවුන්ටරයට ආව. එතන මනුස්සයට කිව්වට පස්සෙ තව කවුන්ටර් එකකට දැම්ම. එතැනින් අයිඩී එකයි, යොමු අංක දෙකයි ඉල්ලගෙන කොහාටද ගිහින් මෙන්න මේ සුවිසල් ටිකට් දෙක ගෙනල්ල දුන්න

ඉතින් ඒකත් සාක්කුවේ ඔබාගෙන ටවුමෙ පොඩි රවුමක් ගහල, ආදි කාලෙ ෆෝන් එකක් හොයන්න ට්‍රයි එකකුත් දීල, ලේසර් ප්‍රින්ටර් වල ගණන් ටිකක් හොයාගෙන, අම්මලවත් හම්බවෙලා ගෙදර එන්න ලෑස්ති වුණා. වෙනදා බස් තියෙන තැන අද බස් නෑ. මාකට් එක ඉස්සරහ රැලිය. කට්ටිය හුරේ කියනව කෑගහනව etc. මට ඉතින් ඒවගෙන් වැඩක් නෑනෙ. අවශ්‍යතාවය ඉක්මණට ගෙදර එන්න. ඉතින් බස් තියෙන්නෙ කොයි ලෝකෙද කියලා හොයන්න දේශපාලන සපෝටර්ලා අස්සෙන් රිංගලා ආවා බන්ධනාගාරය පැත්තට. ඔක්කොම බස් ඒ පැත්තෙන් යන්නෙ. ඒත් නවත්තන්නෙ කොහෙද කියලා හොයාගන්න බැරිවුණා. අව්වයි, රස්නෙයි, දාඩියයි! මෙහෙම උඩ බලාගෙන ඉන්න බැරි හින්ද ත්‍රීවීලර් බුවෙකුට කතාකරල ඒකෙ නැගල ගෙදර ආවා. නැත්තං තාම ටවුන් එකේ

කොහොමද ඉතින්? ආයෙමත් මේ ලියන්නෙ බොහොම කාලෙකට පස්සෙ. පහුගිය දවස් වල පුදුම විදියට කාර්යබහුල වෙලා හිටියෙ. ලියන්න දේවල් කොච්චර තිබුණත්, වැඩ කටයුතු හින්ද ලියන්න වෙලාවක් ලැබුණෙත් නෑ. ලියන්න තරම් හිතක් තිබුණෙත් නෑ. ඉතිං දැන් ඕන එකක් කියලා ලියන්න කල්පනා කරේ. අද ටිකක් සනීපත් නෑ. උණ හෙම්බිරිස්සාව අරව මේව තමයි. මේ දවස් වල ඒව හැදෙන එකත් ටිකක් අප්සට්නෙ. බෙහෙතුත් අරගෙන ආවා.

සුදාරක මල්ලිලගෙ සාහිත්‍ය උළෙල ගැන ලියන්න හිතාගෙන හිටිය. ඒත් ලියන්න ලැබුණෙ නෑ. ඒ ගැන නම් කවුරුවත් දන්නවා ඇති. ෆේස්බුක් එකට ෆොටෝස් එහෙමත් දාල තිබුණනෙ.

eAsia ගැන ලියන්නත් හිටිය ඒත් බැරිවුණා. ඒකෙත් හැබැයි ෆොටෝ තොගයක් ගත්තා, ෆේස්බුක් එකේ තියෙනව දකින්න ඇති.

කොහොමහරි ඒ දෙකම නියම අත්දැකීම් වුණා. හැබැහින් නොදැකපු යාලුවෝ ගොඩක් හම්බවෙන්න ලැබුණු එක හිතට ලොකු සතුටක්. නියම දවස් ටිකක්

මොබිටෙල්, කාලෙකට පස්සෙ අල ගොඩක් භාජනය වුණා. දිගින් දිගටම පැමිණිලි කරාට හරියටම ගැටලුව විසඳුවේ නෑ. කොහොමහරි අද ඉඳලා සම්බන්ධතාවය idle වෙලාවට WCDMA වලත්, සම්බන්ධතාවය භාවිතා වෙනකොට HSDPA වලටත් මාරුවෙනවා. මේක හින්දවත් ගැටලු විස‍ඳෙයිද කියලා බලමු. අද නම් එච්චරම අවුලක් පේන්න නෑ.

ගූගල් වේව් එක පැත්ත පළාතෙ ගියේ නෑ කාලෙකින්. කොහොමහරි තව ආරාධනා 18ක් දෙන්න පුළුවන්. ඕන කෙනෙක් ඉන්නවනම් කියන්න

මදැයි, මුකුත් ලියන්න හිතෙන්නෙත් නෑ. ආයෙ ලියන්න හිතුණොත් ලියනවා. දැනට මෙච්චරයි

කාලෙකට පස්සේ දුම්රියක යන ගමන් බ්ලොග් එකට ලිපියක් ලියන්න හිතුණෙ. උදේ පාන්දරම නැග්ග කොළඹ එන්න. සුදාරක මල්ලි‍ලගෙ ‍සාහිත්‍ය උළෙලට එන්න කියල. කියන්න තරම් විශේෂ දේවල් මුකුත් නෑ, අද අව්ව නම් හොඳට පායලා තියෙනවා. පාන්දරම ඇහැරුණු හින්ද පොඩි නිදිමතකුත් නැත්තෙම නෑ, ඒත් අද නම් නින්ද ගියේ නෑ වැඩිය.

උදේ නැගිටපු‍ වෙලාව ඉඳන් නුවරින් පිටට එනකල්ම මොබිටෙල් ජංජාලය වැඩ කරේ නෑ. සම්බන්ධ වුණත් කිසිම දත්ත හුවමාරුවක් නොවෙන හින්ද එපාවෙලා හිටියෙ. කොහොමහරි දුම්රිය නුවරින් පිටට ආවම මේක හරියට වැඩ කරන්න පටන්ගත්තා‍.  ඔය තියෙන්නෙ ප්‍රතිඵලය තමයි. ගත්තු තැන නම් මතක නෑ. කොහොම වුණත් තවමත් හවස් වෙනකොට මොබිටෙල් පිස්සු නටන එක නැවතිලා නෑ. හදනවා කියල ආරංචියක් නම් ආවා. ඒත් දැනට නම් වෙනසක් නෑ. තිබ්බටත් වඩා අල වෙලා කියන්න පුළුවන්

කොහොමහරි, ගූගල් වේව් ගැන දැන් නොදන්න කෙනෙක් නැතුව ඇතිනෙ. පාවිච්චි කරල බලන්න උද්‍යෝගයෙන් හිටියත් අන්තිමට ලැබුණට පස්සෙ එතරම් වැඩක් නෑ කියල හිතුණ. ඒ දවස්වල ටිකක් වේගයෙන් වැඩකරපු එක දැන් පුදුම විදියට ගාටනව. මොනවහරි ටයිප් කරන්න ගියත් ඒකට යන වෙලාව දැක්කම වේව් දමල ගහන නිකං ඉන්නයි හිතෙන්නෙ. ‍ඒ වුණාට වේව් එකේ ලිනක්ස් ගැන එහෙම හොඳ සංවාදයක් ගිහිල්ල තිබුණ. මේක චැට් කරන්න යොදාගන්නෙ නැත්තං හොඳ විදියට පාවිච්චි කරන්න පුළුවන් වෙයි මොනව වුණත් ඔක්කොටම කලින් මේකෙ තියෙන අල ටික ගලවන්න වේවි.

ඉතින් මට කාවවත් වේව් වලට ආරාධනා කරන්න බැරුව හිටියෙ මොකද ගූගල් එකෙන් මට ඉන්වයිට් දීල තිබුණෙ නැති හින්දා. කොහොමහරි මේ ඊයෙ පෙරේදා ඒ වැඩෙත් හරිගිහිල්ල තිබුණ. ට්විටර් එකෙන් ඉල්ලපු කීප දෙනෙකුටත් දුන්න. දැන් කොහොමහරි දොළොස් දෙනෙකුට ගූගල් වේව් ආරාධනා ලබාදෙන්න පුළුවන්. රැල්ලත් එක්ක ගහගෙන යන්න ඕන නම් නෑ නෑ ගූගල් වේව් හෙවත් රැල්ල ඕන නම් ඉතින් පහළින් කමෙන්ට් එකක් දාන්න.

ඔන්න නැවතත් කාලෙකට පස්සෙ. දැන් නම් නිතරම ලියවෙන්නෙ ‘කාලෙකට පස්සෙ’ ආකාරයේ ලිපි තමයි කොහොම වුණත් අද නම් නොලියා ඉන්න බැරි හින්දයි මේ ලියන්නේ.

අපේ සුපුරුදු මොබිටෙල් ගැන හැමෝම දන්නවා ඇතිනෙ. මේ ළඟකදි අන්තර්ජාල පහසුකම් වල මිල අඩු කළා. කාලෙකට කලින් තිබ්බ ජාල අල ගොඩකුත් පැමිණිලි කිරීම් වලින් පස්සේ විසඳුවා. ඉතින් මොකද දැන් මේ ආයෙමත්‍ මොබිටෙල් ගැන ලියන්නෙ? මගේ ට්විටර් එක එහෙම බලන අය නම් දන්නවත් ඇති දැන්. මොබිටෙල් ආයෙමත් අල වෙලා! දැන් Youtube පැත්තෙ ගිහින් විඩියො එකක් බලන්න ලෑස්ති වුණේ. විඩියෝ බැලිල්ල තියා පිටුවවත් හරියට ලෝඩ් වෙන්නෙ නෑ. ඉතින් ටිකක් තරහ ගිය නිසා මේක ලියල දාන්න හිතුවේ.

සාමාන්‍යයෙන් උදේට තරමක වේගයකින් සම්බන්ධතාවය වැඩ කළත් හවස හයෙන් පස්සේ නම් මේකෙ කිසිම දෙයක් කරන්න බැහැ. බ්‍රෝඩ්බෑන්ඩ් සම්බන්ධතාවයක් කියල හිතන්නවත් බැරි තරමට මේකෙ වේගය අඩු වෙනවා. නිකං ඩයල් අප් වගේ. සමහර වෙලාවකට හිතෙනව ඩයල් අප් මීට වඩා හොඳයි කියලා

ඉතින් මේ පාරත් පැමිණිලි කළා. ඉංජිනේරු අංශයෙන් දෙතුන් පාරක් කතාකරලා විස්තර ඇහුවත් තවම නම් කිසිම විසඳුමක් පැත්ත පළාතකවත් නෑ. හවස් වෙනකොට මේක රීඩයල් කරන එකයි, පිටු refresh කරන එකයි තමයි වැඩේ.

ටික දවසකට කලින් මේ පැත්තෙ ඉන්න යාලුවෙකුත් මොබිටෙල් අන්තර්ජාල සම්බන්ධතාවයක් ගත්තා. ඒත් මේකෙ අල හින්ද එයාගෙ වැඩෙත් මේකට බනින එක තමයි. දවසක් එකම තැනක තියල සම්බන්ධතා දෙක පරිගණක දෙකකින් ක්‍රියාත්මක වෙද්දි, මගේ එක තරමක් වේගයෙන් වැඩ කරත් ඒකෙ වේගය ගොඩක් අඩු තත්ත්වයක තිබුණ. එවෙලෙ කතා කරල පැමිණිල්ලක් දැම්ම, ඊටපස්සෙ මොනව වුණාද කියල නම් තාම දන්නෙ නෑ.

කොහොම කොහොම හරි මේ දවස්වල මොබිටෙල් පාවිච්චි කරන හැමෝගෙන්ම වගේ ඇහෙන්නෙ මැසිවිලි තමයි.

ඇයි මෙහෙම වෙලා තියෙන්නෙ කියන එක ලොකු ප්‍රශ්නයක්. මට නම් හිතෙන්නෙ මේ ළඟකදි ඉඳන් දෙන අලුත් උපහාර පැකේජ මේකට බලපානවා ඇති කියලයි. එක සම්බන්ධතාවයකට තවත් සම්බන්ධතා ගොඩකුත්, දත්ත සම්බන්ධතාවයකුත් තමයි මට මතක හැටියට මේ දවස්වල දෙන්නෙ. මං දන්න ගොඩක් උපහාර පාවිච්චි කරන අය මේවා ගත්තා කියල ආරංචියි. ජාලයට දරන්න බැරි තරම් සම්බන්ධතා දෙනකොට ඒක අල වෙන එක පුදුමයක් නෙවෙයිනෙ

එහෙම තමයි ඉතින් මේ දවස් වල තොරතුරු. මොබිටෙල් අල. මෙච්චර දවස් හොඳට තිබ්බ ජාලෙට මක් වුණාද?

ඕන්න ආයෙමත් කලකට පස්සේ. ලියන්න දේවල් කීපයක්ම තියෙනව අද. මුලින්ම දුම්රිය සහ ගමනාගමනය ගැන තමයි.

ටික දවසකට කලින් කොළඹ ගියා පොඩි වැඩ වගයකට. ඉතින් එතකොට මුහුණ දෙන්න සිද්ධ වුණු දේවල් කීපයක් ගැන තමයි මුලින්ම.

මං බස් වල යන්න කැමතිම නෑ දැන්. හේතුව මොකක්ද මං දන්නෙ නෑ ඒත් බස් එකක ගියොත් මුළු ගමනම නිදාගෙන තමයි යන්න වෙන්නෙ. ඒ හින්ද පුළුවන් හැම වෙලාවෙම දුම්රිය පාවිච්චි කරන්න තමයි වැඩි කැමැත්ත. ඒකෙ ගියාම කිසි අපහසුවක් දැනෙන්නෙ නෑ. කූල් එකේ යන්න පුළුවන්. ඉඩකඩත් තියෙනව. හුළං වැදි වැදී වටපිටාවත් හොඳට බලාගෙන නිදහසේ ගමනක් යන්න කියාපු ක්‍රමය තමයි ඉතින් ඒ. ඉතින් ඊයෙත් මේකෙන්ම තමයි යන්න ලෑස්ති වුණේ.

ඉතින් කලින් දවසෙ ටිකට් වෙන් කරල තිබ්බ නගරාන්තර සීඝ්‍රගාමී දුම්රියට. ඊටපස්සෙ ඉතින් යන දවසෙ උදේ පාන්දරම නැගිටගෙන ආවෙ නැතෑ ස්ටේසමට. එනකොට අපේ අප්පච්චිගෙ යාලුවෙක් එළියට වෙලා බැන බැන ඉන්නව දැක්ක. අහල බලද්දි දුමිරිය අවලංගු කරල. ගේට්ටුවත් වහලා. බැලින්නම් මේ දවස් ටිකේ වැස්ස හින්ද රේල් පාරට ගලක් පෙරලිලලු. ඉතින් මොනව කරන්නද. ටිකට් ටික ආපහු දීල සල්ලි අරගෙන ආපහු එන්න දුම්රිය තියෙයිද කියල ඇහුවම කිව්වෙ තියේවි කියල. නැතිවුණොත් එහෙන් ටිකට් වල සල්ලි ගන්න පුළුවන් කිව්ව. ඊටපස්සෙ නැග්ග බස් එකක.‍ කොච්චර අකමැති වුණත් කරන්න දෙයක් නෑනෙ. යන්නම එපැයි ඒත් ටිකක් දුර එද්දි මෙන්න බොලේ මේක එකපාරටම නැවැත්තුව. තව බස් එකක් ආව. ඔක්කොටම ඒකට නගින්න කිව්ව. හැමෝම බැන බැන නැග්ග. ඊටපස්සෙ ඉතින් ටිකක් නින්ද ගියා. බස් එකක දුර යද්දි ඔළුව උස්සගෙන ඉන්න ‍මාර අමාරුයි මට.

ඉතින් වැඩ කටයුතු ඉවර වෙලා කාලිංගවත් හම්බවෙලා ආව කොටුවට. එනකොට දුම්රිය නම් තියෙනව. ඒත් පේරාදෙණියට විතරලු යන්නෙ. ඒත් ඉතින් කමක් නෑ කියල ආව.

කොහොමහරි ඉතින් හරියටම 3. 35 ට විතර පිටත් වුණා. ඉතින් කිසි ප්‍රශ්නයක් නෑ ඔහොම ගියා. යන අතරතුර අන්තර්ජාලයට සම්බන්ධ වෙලා යාලුවොන්ටත් ටිකක් කතා කරා. අවුලක් නෑ. ඊටපස්සෙ ආයෙමත් ටිකක් නින්ද ගියා.

ආයෙමත් ඇහැරෙනකොට හිටියෙ රඹුක්කන. නවත්තල. මොකක් වෙලාද මන්ද. කට්ටිය බැන බැන ඉන්නව. අනිත් පැත්තෙන් තව දුම්රියක් එනකල් යන්නෙ නෑලු. ඉතින් හිටිය ඔහොම පැය එකහමාරක් විතර. මාර කම්මැලියි. ඔය වෙලෙ ස්ටේටස් අප්ඩේට් ටිකකුත් දැම්ම. කට්ටියටත් කතාකරා. ඔහොම ඉතින් ඉන්නව ඉන්නව යන පාටක් නෑ. ස්ටේෂන් එකේ කැන්ටින් එකට උණු උණු රොටි ඇවිල්ල තිබ්බ. ඉතින් ඒකක් ගිල දැම්ම.

ඊටපස්සෙ ඉතින් දුම්රියේම තියෙන භෝජන රථයට ගියා. ඒකෙන් බිව්ව තේකක්. ඒක නම් නියමයි. ඒ තේකක් රුපියල් තිහයි.

ඉතින් ටික වෙලාවකට පස්සෙ දුම්රිය පිටත් වුණා. පිටත් වෙනකොට දැනුම් දුන්නෙ නුවරටම යනව කියල. ඉතින් නියමයිනෙ කියල හිතාගෙන හිටිය. ඔහොම තව ටිකක් දුර ගිහින් ආයෙ නැවැත්තුවා. ආයෙ බලාගෙන හිටිය. ගොඩාක් වෙලා නවත්තගෙන ඉඳල ආයෙ පිටත් වුණා. ඔහොම ඉතින් නවත්ත නවත්ත දිගටම ආව.

අන්තිමට පේරාදෙණියෙ නැවැත්තුව. මේවෙනකොට වෙලාව 8.45 ට විතර ඇති මං හිතන්නෙ. ඉතින් පේරාදෙණියෙ නැවැත්තුවට පස්සෙ බැහැල ඇවිදගෙන ආව පයින්. මං හිතන්නෙ පොඩි පාලමක් අවුලක් තිබිල තියෙනව. ඒකයි එතනින් එහාට යන්න බැරිවුණෙ.

ඉතින් ඊටපස්සෙ ස්ටේසමේ ඉඳන් ඇවි‍දගෙන ආව එතන ඉඳන් මල් වත්ත හරියටම. ගොඩක් අය කරේ බනින එක තමයි. මාර මහන්සියි. කකුල් දෙකත් හොඳටම රිදෙනව. එතකොටම බස් එකක් ආව. ඒකෙ නැගල ටවුමට ඇවිත් ගෙදර යන බස් එකක් තිබිල ඒකෙ නැගල ගෙදර ආව. ගෙදර එනකොට දහයට විතර ඇති.

ඉතින් සාමාන්‍යයෙන් පැය තුනක් වගේ යන ගමනට එදා පැය හයක් විතර ගතවුණා.

යන අතරෙත් එන අතරෙත් මොබිටෙල් සම්බන්ධතාවය හොඳට වැඩකරා. ඒත් ගෙදරදි ඒක එහෙම්පිටින්ම අලයක් වෙලා තියෙන්නෙ ආයෙමත් සැරයක්.

ලොකුම ප්‍රශ්නෙ දැන් සම්බන්ධ වෙන එක තමා. අන්තර්ජාල සම්බන්ධෙ හදන්නත් කලින් ඉඳන්ම ගැටළු. සමහර වෙලාවට මොබිටෙල් ජාලයට සම්බන්ධ වෙන්නෙත් නෑ. ඒකටත් එක එක දෝෂ ‍එනව. කෝල් එකක් ගන්න බෑ, එන කෝල් සම්බන්ධ වෙන්නෙ නෑ. වෙලාවකට දිගට හරහට missed call alerts එනව. එතකොට කල්පනා කරනව මේ මොකද කියල. ඇයි ෆෝන් එකත් වැඩ. ජාලයටත් සම්බන්ධ වෙලා තියෙන්නෙ.

අදත් අල ටිකක් තිබුණ. රීඩයල් කරල මහන්සි හින්ද Options වල Redial Attempts ගාන වැඩි කරල, Time between Redial attempts තත්පර 1කට දැම්ම. ඊටපස්සෙ ඉතින් කීයට හරි සම්බන්ධ වෙන්නෙ නැතෑ

ඔහොම තමයි ඉතින් මේ දවස්වල වැඩ. ගමනාගමනයත් අල, අන්තර්ජාලයත් අල.

මං කලින් පාරකුත් Live Writer දාන්න ගිහිල්ල වැඩේ අල වුණා. ඉතින් මේ ආයෙමත් ට්‍රයි එකක් දෙන්නෙ වින් 7 ඉඳන්. වැඩේ ගොඩ වගෙයි. මේක මතක් වුණේ අද උදේ යාලුවෙක් බ්ලොග් ලියන මෘදුකාංගයක් ගැන අහපු වෙලාවෙ.

එච්චරයි.

කොහොම කොහොම හරි මේක හරියට වැඩ කරනව. කිසි කරදරයක් නෑ. පින්තූරත් හරියට දාගන්නව. Slug එක වෙනස් කරන්නත් පහසුකම් තියෙනව. ගොඩක් හොඳයි වගේ. ඉදිරියට මේකෙන්ම ලියන්න හිතෙනව. කලින් පාර දාද්දි එක්ස්පී වලද කොහෙද හිටියෙ. ඉන්ස්ටෝල් කරගන්න ලැබුණෙ නෑ. අමුතු දෝෂ වගයක් ඇවිත්.

Windows Live Writer