මේක පොඩි පරීක්ෂණ සටහනක්. ලියන්නෙ මොබයිල් එකේ ඉඳන්. ටයිප් කරන්න ටිකක් අමාරුයි ඒත් වැඩේ ගොඩ.
පසුව ලියමි: හික් වැඩේ හරිගිහිල්ල. මේ ටික ලියාගත්තෙත් බොහොම අමාරුවෙන් හැබැයි. ෆෝන් එකෙන් තමයි එව්වේ. අපේ නාගයා පොඩි පරීක්ෂණ ටිකක් කරලා තිබ්බා එසැනින් පරිවර්තක එහෙම පාවිච්චි කරලා. ඉතින් මමත් ට්‍රයි කරලා බැලුවා. වැඩේ හරි. ඊටපස්සේ ලියපු එක එහෙමම ඊමේල් මගින් බ්ලොග් එකට එව්වා. ඔය උඩින්ම තියෙන වාක්‍ය කිහිපය තමා එව්වෙ.
ඔන්න ඉතින් කලින් ලිපියෙදි කිව්ව විදියට ඉඩ මදියි කියලා ඇපල් මැක් අයින් කළාට එදා දවස ඉවර වෙනකොට නිකං මොකක්ද මොකක්ද වගේ. ඉතින් මොකද කළේ ආයෙමත් දැම්මා මැක් OS. හික්. දැන් දවස් දෙකක් විතර ඒකෙ ඉඳන් වැඩ කළා. ගූගල් පිහිටෙන් වීඩියෝ ඩ්‍රයිවරයක් හොයාගත්ත. දැන් වීඩියෝ වැඩ කරනව. ශබ්දත් අවුලක් නෑ. Ethernet බොහොම අමාරුවෙන් හදාගත්ත ඒත් ඒකෙ පොඩි පොඩි අවුල් වගයක් තියෙනවා. Wireless නම් වැඩ කරන්නෙම නෑ තවම.
සිංහල නම් බොහෝ දුරට වැඩ කරනවා. සිංහල keylayout එකකුත් හොයාගෙන දැම්මා. ඒකත් දෝෂ සහිතව වැඩ. මේ ගැන විස්තර ටික ඔක්කොම දුන්නා දසුන් අයියට. ඉදිරියේදි මේ ගැටළු විසඳන්න පුළුවන් වෙයි කියලා හිතෙනවා.
මැක් වලට එන මෘදුකාංග ගොඩක් නියමයි. මං සාමාන්‍යයෙන් දාන්න ඕන ෆයර්ෆොක්ස් සහ VLC දැම්මා. මේකෙ මෘදුකාංග ස්ථාපනය කිරීම ගොඩක් වෙලාවට පහසුයි. අපට කරන්න තියෙන්නෙ .dmg ගොනුව බාගෙන ඒකෙ තියෙන වැඩසටහන් ගොනුව Applications ෆෝල්ඩරයට දාන එක විතරයි.
චැට් කටයුතු සඳහා iChat තිබුණත් මං Adium දාලා බැලුවා. ඒක නම් නියම මෘදුකාංගයක්.
iTunes නම් පුදුම හිතෙන විදියට වැඩ කරනවා. වින්ඩෝස් වලදි නම් මට පේන්න බැරිම මෘදුකාංගයක් තමයි. ඒත් මැක් වලදි ගොඩක් වේගවත්. Cover Flow එහෙම හිතන්නවත් බැරි තරම් වේගයෙන් වැඩ.
ඉතින් දැනට එපමණයි. මැක් වල සිංහල තවත් ටිකක් දියුණු වුණාට පස්සෙ ඊළඟ ලිපිය මැක් එකකින්ම ලියන්න හීනයක් තියෙනවා. 😀
ඔන්න ඉතින් අද වෙච්ච වැඩේ. අද නිදහස් දිනේ තමා ඒත් ඉතින් උදේ නැගිටිනකොටම මට පේන්න බැරි හෙම්බිරිස්සාව ලෝඩ් වෙලා. දවසම අල. ඒ මදිවට දවල් වීගෙන එනකොට අව්ව පායන්න ගත්තා නිකං කාන්තාරෙකට වගේ. ගස් මැලවිලා, බල්ලො පූසො වැටිච්ච තැන්වල නිදි. පෝරණුවක් වගේ කිසිම දෙයක් කරන්න හිත නෑ.
අද අප්පච්චි දවසම පරිගණකය ළඟ හින්දා කරන්න කිසිම දෙයක් තිබුණෙ නෑ. ටීවී එකේ බලන්න විසේස දෙයක් තිබ්බෙත් නෑ. උදේ නිදහස් දින උත්සවේ නම් ටිකක් බැලුවා. ඒකත් බලන්න කම්මැලියි වගේ. ඉතින් එහාට යනවා මෙහාට යනවා, කෑගහනවා. කැරකෙනවා. ඔළුව රිදෙනවා හොටු හූරනවා – දවසම ඉවරයි.
කිසිම දෙයක් කන්න හිතෙන්නෙත් නෑ. බොන්න හිතෙන්නෙත් නෑ. ටවුමට යන්නත් විදියක් නෑ. කාලෙකින් චිත්‍රපටයක් බැලුවෙත් නෑ. දැන් බලන්න දේකුත් නෑ. ස්නැක් ක්‍රැකර් එකක් ගෙනල්ලා හවස ඉවරයක් කරා. ඔච්චර තමයි අද දවසටම වැඩකට ඇති දේකට කළේ. 😀 බිපෙසි.
මේ ටිකත් ලියාගත්තෙ හෙණ කම්මැලිකමේ. තාමත් ඔළුව රිදෙනවා. හෙම්බිරිස්සාව තරම් එපාකරපු දෙයක් තවත් නෑ. හපෝයි!
ඔන්න ඉතින් අද වින්ඩෝස් 7 බීටා එක දැම්මා ආයෙ. කලින් දාලා තිබ්බෙ 6801 නෙ. ඊයෙ කාලිංග එව්ව තැටියෙන් 7000 දැම්මා. ගොඩක් හොඳ පාටයි. ඩ්‍රයිවර ස්ථාපනය වීම එහෙම වින්ඩෝස් අප්ඩේට් හරහා සිද්ධ වෙනවා. දැනට වැඩ නොකරන්නෙ ටීවී කාඩ් එකේ ශබ්ද විතරයි. අනික්වා අවුලක් නැතුව වැඩ (වගෙයි) – පොඩි ගාටන ගතියක් තියෙනවා ඒකට ඉතින් කරන්න දෙයක් නෑ.
මේ අස්සෙ තමයි මේ චිත්‍රපට වැඩේ වුණේ. චිත්‍රපටය The Last Samurai. මං කැමති චිත්‍රපටයක්, ඩීවිඩී එක බලලා තියෙනවා. ටොම් කෲස් තමයි ප්‍රධාන චරිතය. ඉතින් අද මේක සිරසෙ විකාශය වෙනවා. මං ටීවී කාඩ් එක අටවලා බලනකොට තමයි දැක්කෙ ඒක යන වග. ඉතින් ටිකක් වෙලා ඔහොම බලාගෙන ඉඳිද්දි නියම වැඩක් වුණා. Last Samurai කියන්නෙ යුද චිත්‍රපටයක්නෙ. ඒකෙ පළවෙනි සටනෙදි මෙන්න බොලේ එකපාරට එක එක කොටස් කළු සුදු කොටු දාලා වැහෙන්න ගත්තා :O
බැලින්නම් කඩුවකින් පහර දෙන අවස්ථා වලදි වගේ තමයි මෙහෙම කොටු වැටෙන්න ගත්තෙ! මං අන්දමන්ද වෙලා බලාගෙන හිටිය. මල්ලි ඇහුවා ‘යුද්ද කරන ගමන් සිගරට් බොනවවත්ද’ කියලා. මොකද කලින් එහෙම කොටු කොටු දාන්න ගත්තෙ මත්පැන් සිගරට් වගේ ඒවටනෙ.
තවත් ටිකක් වෙලා බලාගෙන හිටියා. ඊළඟට සමුරායි ගමට පහරදෙන දර්ශනයක් තියෙනවා. ඒකටත් ඒ සංසිද්ධියම තමා. ගහගන්න ටික පෙනල්ලා කඩුවකින් අනින තැනට, ඊතලය ඇනෙන තැනට කොටු කොටු දාන්න ගත්තා. මටයි මලයටයි පණ යන්න හිනා 😀 සමහර තැන්වල සද්දෙ ඇහෙද්දි කොටු දිහා බලාගෙන ඉන්න ඕන.
මෙහෙම චිත්‍රපටයක් බලලා ඇති වැඩක් තියෙනවද මං අහන්නෙ?
හික් ගොඩ කලකින් ලිව්වෙ නෑ මුකුත්. දැන් ඉතින් ආයෙත් ලියන්න යන්නෙ ‘ලියන්න බැරිවුණාට දුකයි etc etc’ – මේක නම් කිසිම තේරුමක් නැති වැඩක්. නිතර නිතර සති ගාණක් නොලියා ඉඳලා එකපාරටම ලියන්න පටන්ගන්නෙ අනේ සමාවෙන්ඩ ලියන්න බැරිවුණානෙ කියලා. මොන කෙහෙල්මලක්ද 😀
දැන් නිතර නිතර කොළඹ යැවෙනවා. අදත් ගිහින් ආවෙ පොඩි වැඩ වගයකට. මං සාමාන්‍යයෙන් අකමැති නගරයක් තමයි කොළඹ. ඒත් ඉතින් දැන් ටික ටික පුරුදු වේගෙන එනවා වගේ. තව ටික දවසක් යනකොට කොළඹ නැතිව බැරිවෙයිද මන්දා :O
මොබිටෙල් එකේ තත්ත්වය නම් ගොඩක් හොඳයි දැන්. ඉස්සර වගේ හැම මාසෙම බිල ආවම ඔළුව අවුල් කරගන්න අවශ්‍ය නැති වෙයි (කියලා හිතෙනවා) දැන් මාසෙට ගිගාබයිට් 7ක් තියෙනවනෙ. මේ මාසෙ (24) දිනට පාවිච්චි කරල තියෙන්නෙ ගිගාබයිට් 3.5 ක් විතරයි. සමහරු අනාවැකි කිව්වෙ මාසෙට 7 අනිවාර්යයෙන් පනිනවා කියලා. කියන්න බෑ මොනව වෙයිද කියලා. වේගය ගැන නම් ඉතින් කතාකරලා වැඩක් නෑ. කොළඹට කිරි ගමට කැකිරි වගේ මෙහෙට 1mbps වගේ වේගයක් තමා එන්නෙ. කොළඹදි නම් 2mbps විතර එනවා කියලා ආරංචියි. ඒත් ඉතින් මේ මදෑ.
තවම ADSL නැති එක නම් පුදුම පාඩුවක්. ඒ ගැන කතාකරලා වැඩක් නෑ.
ඕන්න ඉතින් අපේ කාලිංග ක්‍රෝම් වලට මාරුවෙලා ටික දවසකට පස්සෙ මාත් දැන් ක්‍රෝම් වැඩි වැඩියෙන් පාවිච්චි කරනවා. මට මෙච්චර දවස් ඇඩ් බ්ලොක් කරගන්න විදියක් නැතිව හිටියෙ ක්‍රෝම් වල. එතකොට තමයි කාලිංග කිව්වෙ HOSTS ගොනුවක් මගින් ඇඩ් බ්ලොක් කරලා දාන එක ගැන. මේ ක්‍රමය හින්දා දැන් අවුලක් නැතිව ක්‍රෝම් පාවිච්චි කරනවා. දැන් දාලා තියෙන්නෙ 2.0.158.0. මං ෆයර්ෆොක්ස් පාවිච්චි කරන කාලේ ඉඳන් දැන්වීම් අවහිර කරන හින්දා මේකෙත් ඒක නොකර බෑනෙ 😀
කොහොම වුණත් ඇඩෝන සහය ටිකක් දියුණු වෙන්න ඕන. මං ෆයර්ෆොක්ස් වල පාවිච්චි කරන අත්‍යාවශ්‍යම ඇඩෝන දෙකක් තියෙනවා. Firebug සහ Web Developer Toolbar.
කොහොම වුණත් ක්‍රෝම් වල පොඩි අවුල් දෙක තුනකුත් දැක්කා. දැනට තියෙන එක ප්‍රශ්නයක් තමයි spacebar එකෙන් පිටුව ස්ක්‍රොල් කරන්න බැරි එක. ඔන්න ඒක වැඩ 😛 මට පිස්සුද කොහෙද! අනික ටැබ් වල මාතෘකා නැතිවෙන එක. තාම ඉතින් සංවර්ධන මට්ටමේ හින්දා වෙන්න ඇති.
ඒ අස්සෙ Windows 7 එකේ 6801 දාලා බැලුවා. (7000 නෙවෙයි) මගෙ මැසිම කසිකබලක් තමයි ඒත් ඉතින් මේක එච්චරටම අවුලක් නෑ. විස්ටා වලට වඩා සුළු වශයෙන් වේගවත් ගතියක් දැනෙනවා ඒත් විස්ටා වලට වඩා ගොඩක් හිතට ඇල්ලුවා. මේක දාන්න අප්ග්‍රේඩ් එකක් දෙන්නත් හිතෙනවා දැන් නම්!
අදට ඇති. හික්.